Close

رواتب الموظفات..بالعشرينات والثلاثينات!

علاوي بالشماغ

أنا متأكد أنكم جميعا في شوق لقراء مغامراتي..و اسمحو لي على هذا التأخير.. ولكن أنا قلت لكم أنني كسلان جدا ..ولذلك  طلبت من أسامة أن يكتب على لساني إلا أنه رفض كالعادة فاضطريت في النهاية ان أنزل إلى ميدان الكتابة بنفسي!

ماعلينا …

المهم …البارحة كنت جالسا مع  الشباب في شيشتنا المفضلة نتناقش عن الكادر الوظيفي الجديد وسلم الرواتب الذي تم تغييره بالكامل في الدوائر الحكومية بأبوظبي بعد تحوله إلى نظام الراتب الشامل، وبصراحة يوم عرفت  الأرقام الفلكية التي ذكرها الشباب و عن الرواتب الخيالية التي يستلمها البعض منهم بدأ لعابي يسيل.. وتخيلت نفسي من أصحاب الرواتب الثقيلة .. أول شيء بسويه هو أن أعزم ربعي و أصدقائي في أحسن شيشية في البلد.. الي يشتغلون فيها من هالمزايين قوم بو شفاف و فوق الركبة…ما بخبركم اسم المكان علشان ما آخذ اثمكم!

طبعا أغلب الشباب فرحانين ومستانسين على هالرواتب الجديدة فالأغلبية تضاعفت رواتبهم وصاروا يستلمون.. الشيء الفلاني ولكن  الي استفاد أكثرمن نجح في إكمال نص دينه الثاني و زاد عليه … يعني الي قدر يبني بيته أو عنده بيت ملك.. لأنه معناه إنه بيستلم راتبه كامل مكمل و غير محتاج إنه يفكر في الإيجار ولا هم يحزنون..خصوصا مع هذا الغلا الفاحش في الإيجارات…. عقبالك يا أسامة!

لكن النقطة استغربت منها   والي الكل تحفظ عليها هي إنه بعد هالتغيير صار الموظف المواطن والموظفة المواطنة يستلمون نفس الراتب! وعلشان أكون دقيق إنه في فرق بسيط لا يكاد يذكر، هالفرق متمثل في علاوة  الأبناء فقط.. لأنه على كل راااس قصدي ولد 600 درهم فقط .. يعني الموظف أبو العيال هو والموظفة الخريجة (سيم سيم) مثل ما يقولون!

فإذا الموظف تضاعف راتبه مرة أو مرتين مع الزيادة الجديدة.. الموظفات الي يشتغلون في نفس الدائرة  تضاعف رواتبهن ثلاث و أربع مرات …تخيل موظفة  .. ما عليها مسؤوليات و لا التزامات و يزيد راتبها من 6 أو سبعة آلاف و يصك* راتبها لـ 20 و 30 ألف (*يصك معناها يصل بالفصحى!)  … طبعا أنا أتكلم عن الموظفة المتعينة بالدبلوم أو بالشهادة الجاميعة  فما بالك (بصاحبات) الدرجات العالية… يعني على البارد يوصل راتبها 60 ألف أو 70 الف حسب الدرجة و المنصب الي تحتله…و بما أن الموضة الدارجة هالأيام هي (التأنيث) في أغلب الدواير.. (فالرابح الأكبر) بلا شك هم الموظفات…!

واحد من الشباب يقول إنه أغلب الموظفات الي في دائرته  بدلوا سياراتهم مع نزول أول راتب.. الي اشترت لها مرسيدس S500  و إلي طلعت لها لكزس آخر موديل.. و رنج روفر .. و بالمناسبة النوع الأخير هو الأكثر طلبا بلا منازع حاليا حسب كلام صديقي في قسم المرابحة في بنك من البنوك.. يعني بكرة الرنج بيصير مثل التكسي من كثرة ما نشوفها  في الشوارع…..
طبعا هالمسكين بعده يسوق تويوتا كورولا.. و قاعد يشاورنا  يطلع كامري وللا ألتيما!

وواحد ثاني يقول من بعد زيادة الراتب كل يوم يشوف زميلته الموظفة بشنطة جديدة..مرة فرساتشي.. و مرة جفينشي.. و مرة  لويس فيتون… مطقمة على تطريز العباية ولون النعال الله يكرمكم…يعني كلها كماليات في كماليات…مالها داعي!

يا ليتهم بس يحولون باريس غاليري و للا أريج لشركة مساهمة عامة.. جان اشتريت نص أسهمها..و اشتريت بالنص ثاني محل عبايات !

بضمن لي من الأرباح  حياة مرفهة لي و لأولادي من بعدي!

طيب.. قلنا حقوق المراة و مساوة و ما أدري شو..و لكن لابد (حلوة لابد هذي)  أن يكون في فرق في الراتب بما يتناسب مع الفارق الواضح -ما بقول كبير علشان ما يزعلون الحريم علي- بين الرجل و المرأة في المسؤوليات والالتزامات الحياتية، فالرجل كما هو معروف مطالب بفتح بيت و الصرف عليه وتربية الأولاد والصرف على احتياجاتهم و دراستهم، بعكس الحرمة الي ما عليها التزام غير حسن تربية الأولاد والمحافظة على البيت.. و إذا  بتتكرم و بتطبخ لأهل البيت.. فخير و بركة.. و لكن الله يخلي الخدامات.. أظني مع هالراتب  الخيالي للموظفة بدل ما تجيب خدامة بتجيب 5 خدامات.. شو وراها  لأن رواتبهن مجموعة ما بتزيد عن 3000 درهم..يعني عشر الراتب ما يظر!

وبعدين تخيلوا معاي بنت عزوبية متخرجة واشتغلت و استلمت راتب من هالراوتب الـ (Heavy Duty)  هل تظنون إن الزواج بيكون من ضمن أولوياتها؟
و هل ممكن تضحي بوظيفة تدخلها شهريا 20 أو 30 الف؟

و الله لو جاها من ما جاها و خيرها بين الزواج والوظيفة… عادي تقول له و اسمحو لي على الكلمة : (طز فيك) الوظيفة أبرك لي….و عزوبية دهر.. و لا قاعدة في البيت شهر!

وتراني أقول لكم من الحين .. أنا مش مفتي و لا شيخ.. بس الله قال في القرآن الكريم في تفصيله عن الميراث أنه (للذكر مثل حظ الأنثيين) لأنه مقدر مسؤوليات الرجل في الحياة ومستشعر لالتزاماته بالمقارنة مع المرأة…فما أدري على أي أساس يتم مساواة الرجل و المرأة في الراتب..و على أي أساس أصلا يستلمن هالراتب العالي؟

و أعتقد أنه الكل سمع عن حالات كثيرة منع فيها أولياء أمور بناتهم من الزواج للاستفادة من رواتب بناتهم الموظفات.. هذا كان أيام ما كانت تستلم الموظفة أربعة و خمسة آلاف… فما بالك لو عرفوا أنه بناتهم صارت رواتبهن بالعشرين و الثلاثين ألف.. و الله ليصك عليها بعد الدوام و بيحطها داخل التجوري!

و ما بتكلم عن الكفاءة الوظيفية و أقارن بين أداء الرجل والمرأة  لأتي اصلا مش كفؤ أني أتكلم عنها كوني عاطل عن العمل حاليا و لله الحمد يعني بالعامية (بطالي) و لكن صدقوني سأحرص إذا ما حصلت على وظيفة إنه راتبي ما يكون مساوي لراتب سميرة و للا أميرة…لأني بصراحة ما أقدر أستحمل فكرة إني أستلم نفس الراتب.. و اشتغل ضعف الشغل!

مب كأني طولت عليكم..أظني أسكت أحسن لي و أدور لي مكان  أتحصن فيه في الويكند  من الهجمات النسائية الي أكيد ما بيعجبهم كلامي!

(4267)

50 thoughts on “رواتب الموظفات..بالعشرينات والثلاثينات!

  1. عللواي و الله انك تنكت.. أجل طز فيه، و الثانية الله لا يبتلينا يصك عليها في التجوري:)
    معك حق في إن المرأة تنافس الرجل في المرتب، لكن بعد ما تلاحظ إن المرأة أكثر جدية من الرجل على الأقل في مجتمعاتنا، قارن بين الطلاب و الطالبات و شوف البنت كيف تكرف، و الولد ملّت المقاهي منه و يسافر بنص الأسبوع وفالها، و البنت جالسه ماعندها إلا دراستها كيف تتوقع يكون مرتبها في وظيفة المستقبل؟

    سالفة المرأة و الرجال و المساواة أغبى سالفة مرت عليّ من يوم انخلقت، طالعه برا الفطرة، يعني أغبى انسان قاعد يقارن بين اثنين مابينهم أي وجه شبه، مثل ماتقول يقارن بين التلفزيون و الثلاجه، وين وجه الشبه؟!

    عموماً طولت عليك بس أتوقع انك ياعللاوي تقدر تحرف مسار هذي القضية و تبين الفرق بين المرأة و الرجل، و إن لكل واحد صفات تميزه عن الثاني..

    الله يهديك خليتني عللاويه:)

  2. لحظة …موظفة تستلم 20 ألف …

    ممكن أعرف نوعية الوظيفة أو حتى على أي مرتبة ..؟

    يمكن أفكر أحول عندكم …!!! لأن العلاوات عندنا تسير سير السلحفاة ..

    وأريد أفهم اعتراضك بالضبط …على ماذا …؟؟

    تساوي راتب الموظفة مع الموظف ..؟؟..

    طيب …

    هناك شريحة كبيرة جداً من الموظفات يقتسمن مصاريف الحياة مع أزواجهن …

    بل أصبح هذا لزاماً مع سرطاان الغلاء الفاحش الذي انتشر مؤخراً في جميع المستهلكات الحيوية ..

    ربما المؤسف في الأمر …

    أن بعض الموظفات يبددن أموالهن في ( الفشخرة والكلام الفاضي )..

    بينما هناك في أوطاننا ، أناس تعيش تحت خط الفقر .. والله المستعان …

    لكنني غير مستوعبة أن هناك موظفة حديثة التخرج تستلم 10آلاف ، ما بالك بأكثر ..!!

    ( علاوي إنت شكلك عاطل صح ولا لا ..؟؟!!)

    عموماً …

    أسأل الله لنا ولكم البركة في الرزق ، فوالله إن شكوى هذا الزمن قلة البركة في الوقت والمال

    والله المستعان ..،

    هامش :

    علاوي ما هي صلة القرابة بينكم وبين الأخ ماجد …بطل غلاف مجلة ماجد ..؟؟!!

    ممكن أعرف؟؟ !! وترى مو لازم اسم العيلة .. … ( :

  3. اللي فهمته هو إن معاش الموظف و الموظفة نفس الشي *_*
    ما شاء الله عليهم ما يقصرون المسؤولين ..
    لا تنسى إن النساء هم شقائق الرجال 🙂
    أنا ما أنكر إن الرجل لازم يكون عنده معاش زين عشانه يعيل أسرة
    بس شو بيصير إذا الحرمة و الريال ياخذون نفس المبلغ كل شهر؟!
    الحرمة ترا بعد لازم تأمن مستقبلها..باجر زوجها يمكن يتزوج عليها و تتوهق..فبيزاتها هي اللي بتفيدها 🙂
    و بعدين وين يحصلون هالمعاشات..20 و 30 ألف..؟
    قول لي عسب يوم أتخرج أسير و أشتغل عندهم ههههه
    بس تبا الصدق..الحرمة مكانها في بيتها ..ما شي أحسن من تعاليم ديننا الحنيف
    ماعرف ليش هالحريم متكودات في الدوائر الحكومية و بقية الأماكن
    و كل يوم شنطة ماركة على قولتك و سيارة يديدة..

  4. أنت تأخذ المرأة هذا المبلغ إلى الآن لم أستوعبه ؟؟!!
    ربما في مناصب عليا جدا ،،
    أو أبوظبي تحب الفشخرة الزائدة ( ففشخرت موظفاتها ) ؟؟!!

    أخي الطيب ،،
    أجل المرأة مكانها البيت ولا وجه مقارنة أبدا بينها وبين الرجل
    ولا حتى حقوقها التي ظهرت لنا في الآونة الخيرة ؟؟!!!

    لكن ،،
    في هذا الزمن أصبح عمل المرأة شي مفروغ منه بسبب غلاء المعيشة ،،
    ثم أنني أفضل عمل المرأة في زمن رجل اليوم (المزواج) ،،

    إحترامي الشديد 🙂

  5. ما اعرف ليش العنصرية والحقد اللامتناهي على النساء…انت ما تقدر تعمم الموضوع…صحيح في فئة وما راح اقول انها قليلة..ولكن هاي الفئة خلتك تاخذ هذا الانطباع السيء على الموظفات….لكن تذكر انه اصابع يدك مش متشابهه… و في فئة كانت محتاجة لمثل هذا النوع من الزيادة في الراتب… في مطلقات..ارامل…او اللي زوجها مب محصل وظيفة والا يشتغل براتب بسيط.. ماكانت هاي الزيادة كالفرج لهم خصوصا مع الزيادة في الاسعار والاجارات في الوقت الراهن؟؟

    ثاني شي..موضوع الزواج… اللي اشوفه انه اكثر الرياييل لما يبون يتزوجون يحطون شرط “انها تكون متوظفه” على قائمة مواصفات زوجة المستقبل (سيارة مب حرمة) …مب هذا دليل على ان عقليات بعض الرجال اختلفت في وقتنا الحالي وصار الرجل يدور على البنت اللي تقدر تعينه في امور المعيشة وفي نفس الوقت تعتمد على نفسها —- (لكن هني ما ننسى انه مهما كان فالرجل مسؤول عن المراة حتى ولو كانت تشتغل وتستلم راتب)

    ثالث شي.. . انا ما اشوف انه انتاجيتهن في العمل اقل من الشباب… بالعكس.. اللي صاير عندنا العكس… وغير جي التعب اللي راح يتعبه الريال والشغل اللي راح يشتغله هو نفس الشغل اللي تسويه الموظفة… فليش التفرقة في الراتب؟؟ يمكن التسيب في الدوائر الحكومية يكون واضح ومحد يقدر يتكلم عن او يتخذ اجراء للحد منه…لكن في الشركات الخاصة وشبه الخاصة الانتاجية شي مهم جدا..والموظف اللي ماينتج مصيره الطرد في كثير من الاحيان ..سواء كان موظف او موظفة

    رابع شي… بــ 5000 درهم تشتري حقيبة يد… ماراح اقولك ال5000 هاي شو تسوي في افريقيا..ولكن..انا شخصيا ما امانع انه الوحدة تشتري شي راح تستخدمه حتى لو كان غالي..ومب الغرض منه الفشخرة والكلام الفاضي..

    خامس شي… طولنا في الرد… والزبدة: انا مب ضد الكلام اللي انت كتبته لانه صحيح وينطبق على فئة من الموظفات..ولكن الاسلوب الهجومي عى القوارير خفف منه فهناك فئة مغلوبة على امرها :p

  6. أصبحنا و أمسينا و الملك لله…. خمس ردود.. و كلها نسائية!

    وماشاءالله..كل رد أطول من الثاني..!!

    أوركيد..

    ابتهال الفجر

    أراميا المشاكسة..

    و عابرة القارات..

    و ألحان النشاز…

    راجع لكم.. .. و لكن مب الحين.. بعدين.. على رواقة.. خصوصا ألحان النشاز.. شكها موظفة.. و مب عاجبها كلامي.. و لكن ردي.. جاهز دوما .. هاها!

  7. صباح الخير ،،
    ميلودي ،، إسمحي لي بالتعقيب بعد إذن الأخ علاوي ،،

    رابع شي… بــ 5000 درهم تشتري حقيبة يد… ماراح اقولك ال5000 هاي شو تسوي في افريقيا..ولكن..انا شخصيا ما امانع انه الوحدة تشتري شي راح تستخدمه حتى لو كان غالي..ومب الغرض منه الفشخرة والكلام الفاضي.

    إذا هذي مب فشخرة وش تسميها عيل ؟؟!!

    بالنسبة لي راتبي جاء بعد تعب وحرقة أعصاب ،،
    إذا راح أصرفه أعرف وين أحطه ،، ما راح أشتري شي مبالغ فيه لأنه ماركة ،، بالعكس بشتري شي له قيمة ومب شرط ماركة ،،
    ترى الكماليات كلها تروح بسرعة وتبلى ،،
    غير إن الموضة كل يوم في تجدد ،،

    مب حرام 5000 درهم على حقيبة لو طلعت سوق ثاني مب سنتر معروف ، بحصله عنده وبثمن أقل !!

    إحترامي

  8. صباح الخير

    أخي علاوي، لماذا كل هذا التحامل على مساواة راتب المرأة مع راتب الرجل؟
    أليست المرأة هي موظفة مثلها مثل الرجل وتتعب وتشقى مثله تماما

    لن أتكلم عن الدوائر الحكومية، ولكن ما أراه في الشركات الخاصة، بأن السيدات يقمن بأعمالهن بشكل أفضل بكثير من الرجال، ملتزمات أكثر ومخلصات بشكل أكبر

    ثم من قال بأن الجميع يصرفن روابتهن على الفشخرة وما شابه؟ إنها فئة قليلة ولا يحق لك التعميم على الجميع

    هناك نساء يشاركن في مصروف البيت مثلهن مثل الرجل، ويصرفن على أهاليهن
    ومن ثم يعدن للبيت بعد ساعات العمل، لتكملة واجباتهن المنزلية

    بهذا ترى بأن المرأة تشقى أكثر من الرجل، وليس الجميع لديهم خدم وليس الجميع يتفشخرن دون حساب

    هدئ من روعك أخ علاوي، وناقشنا بما هو واقعي، دون التعميم من فئة قلية على الجميع

    ودمتم

  9. وأخيرا طلعت انت ، ، والله من يومين كنت بسأل بوعامر عنك ، قلت يمكن حابسنك في الكبت ولا في المستودع !

    بس تبا الصراحة ، أنا بخلي سالفة الحريم اللي قلتها ، لأني ما بقدر أختفي مثلك بعدين ، لكن أتكلم عن السكن ، يعني اللي ما عنده بيت أو ساكن مع أهله في بيت واسع ، راح يتورط ، لأن راتبه قفز من 10 لين 20 ،، وفي المقابل بيدفع 11 ألف كل شهر عشان السكن ( المحترم )
    يعني كأنك يابوزيد ما غزيت ،،

    وأنا أقول كل واحد يدور الحرمة الزينة ، اللي تداوم في المحلية يضمن راحة البال بس شرط تكون عنده كلمة !!!

  10. شوف يا أخوي علاوي ….

    أنا ما اشوف فيها مشكلة بمساواة الرجل بالمرأة من ناحية الراتب إذا كانوا بنفس العمل !

    يعني مدرس ومدرسة تعينوا بنفس السنة , شي أكيد بيكونوا نفس المرتب , وهذا حق من حقوقها اللي ألزمنا الإسلام بها …..

    وبعدين انت لاتشوف الحريم اللي يتفشخرون , شوف البنات الطيبات اللي قايمة على بيت اهلها وتصرف عليهم …

    تخيل وحده أبوها مقعد وأخوانها صغار …. بالله شلون بيلقون مصروف لهم بعد الله إلا هالبنية …

    الأمر الآخر .. أنا والله ما أحب سالفة الزيادة أبداً لأنه معروف بعدها بترتفع الأسعار عل الجميع ويروح فيها المتسبب ( بدون عمل ) أو اللي مالقى وظيفة .

    عندنا في السعودية زادت الرواتب وماوصلنا السنة إلا وزادت الأسعار عيني عينك …

    الله يوفق الجميع ويارب ترخص الأسعار ….

    باين من أولها علاوي أنت راعي مشاكل 🙂

  11. بغض النظر عن الراتب كبير او قليل

    مجرد خروج المرأة من بيتها للعمل وتركها تربية الاطفال للخادمة يعد اخلال بوظيفة المراة
    الاساسية التي خلقها الله تعالى لاجلها … وبالتالي خلل في ركن اساس من اركان المجتمع
    وهو ما يريده الغرب

    وقريبا سترون الجيل القادم … ابناء الومظفات المتربين باشراف اسيويات او فلبينيات صليبيات
    جيل منحل يحمل كل الافكار الغربية التي تم غرسها في عقولهم ومبادئهم في المدرسة بعيدا عن متابعة الام الموظفة المشغولة بالعمل

    تحياتي

  12. تعديلا لمشاركتي السابقة

    بغض النظر عن الراتب كبير او قليل

    مجرد خروج المرأة من بيتها للعمل وتركها تربية الاطفال للخادمة يعد اخلال بوظيفة المراة
    الاساسية التي خلقها الله تعالى لاجلها … وبالتالي خلل في ركن اساس من اركان المجتمع
    وهو ما يريده الغرب

    وقريبا سترون الجيل القادم … ابناء الومظفات المتربين باشراف اسيويات او فلبينيات صليبيات
    جيل منحل يحمل كل الافكار الغربية التي تم غرسها في عقولهم ومبادئهم في المدرس الخاصة الاجنبية بعيدا عن متابعة الام الموظفة المشغولة بالعمل

    تحياتي

  13. بصراااااااحه كلام الأخ مبارك سليم و اضح (خير الكلام ما قل ودل).

    انا مو ضد ان الحرمه تعمل وتاخذ راتب عالي بالعكس المحتاجه لها الحق انها تعمل ولااااااااااااكن الي مش محتاجه؟؟؟؟؟؟؟ انا اعرف حريم رواتب ازواجهم عاليه جدا ومش ناقصه شي ولكن تقول قعدت البيت ممله وزوجي يحترمني يوم اشتغل 🙁

    أنا في رأي اخذ الشهاده مهمه جدا للمرأه وإذا لا سمح الله صار شي بتكون جاهزه بشهادتها.

  14. اخي عللاوي

    صراحة من حقك تزعل وتتضايق
    بس انا اوافق احد الاخوات التي قالت ان المرا اصبحت مساولة عن المصاريف واعباء المنزل حالها حال الرجل

    اعتقد انه طالما ان المراه تمت معاملتها مثل الرجل في الوظيفة واللرواتب فيجب ان يتم معاملتها ايضا في ضغط العمل

    الكثير يقولون ان المراه تشتغل اكثر من الرجل في الوظيييفة
    اقووولهم اسمحولي انتو غلطااانين
    صح في الدراسة البنت ماوراها غير دراستها وبيتها والكثير من الاهل يغلقون عالبنت قبل لا تتزوج او حتى تشتغل بس بعد ذلك تعال جوووف,,,, عينك ماتجوووف الا النوووور

    الزعل لازم يكون على مقارنة المهندس والدكتور بالموظف الاداري !!؟
    اعتقد ان هذا الموضوع يجب ان يتم اعادة النظر فيها اما فيفيما يتعلق بالحريم فاعتقد انه الان لازم نكرفهم اكثر مثل الرجل …. مب والله اجازة وضع ….ساعة رضاعة…. تعبانه….انا حرمة ماقدر اتاخر بالدوام….ماقدر اطلع مواقع ….ماقدر ايلس ويا ريايييل !!؟ لازم يتعاملزن حالهم حالنا

    تحياتي

  15. السلام عليكم

    مسا الخير

    عزيزي علاوي

    والله انك قلت اللي في خاطري

    لازم يفرقون بين الموظق المتزوج و الموظف غير المتزوج

    سواء رجل او امراة

    النساء العزوبيات المفروض لا تتساوى راتب المتزوجه او المتزوجه اللي في نفس المستوى العملي لازم يكون في فرق

    نعم ابوظبي ضعف رواتب اي امارة من امارات الدولة

    و لكن عزيزي علاوي ثلاثة ارباع العاملين في دواير و حكومات ابوظبي نساء في نساء

    روح هيئة الصحة و الدار و تبادل وهيئة الكهرباء وغرفة وتجارة ابوظبي هذه المؤسسات يكثر فيها النساء

    سؤال اين الرجل من هذه الوظائف ؟؟؟؟؟

    و لا زمن الرجاء راح وولا و زمن الشيله و النقاب

    ابا اعرف ليش البنت تركض ورا الشغل اكثر من تفكيرها بالحياة الزوجية

    اذا قلنا في حريم يشتغلن و عندهم عيال يعني عيالهم عند الخدم او في الحضانة

    غريب امر حريمنا يفكرون في المادة و لا يفكرون في تربية العيال

    الله كريم

  16. يعني أغيب لي يوم أرجع أشوف 17 رد… و الله طلعت خطير يا عللاوي هاها!

    طيب نبدا بالآنسة أوركيد.. إذا مو أنا غليطان يعني!

    الحين أريد أعرف شو دخل الدراسة في الوظيفة؟.. شي طبيعي إنه البنت تتوفق على الولد في الدراية لأنها قاعدة في البيت مو نفس الولد الي أغلب أوقاته برع البيت.. وبعدين أنا أشوف إنه إنجاز إنه الولد يتفوق و يجيب علامات عالية و هو جامع بين الاثنين.. الصياعة خارج البيت و الدراسة في نفس الوقت… هذا معناه إنه الأولاد عباقرة!

    أما في الوظيفة يكون في كلام ثاني.. الرجال مسكين يكرف و يشقى.. و الحرمة عادة ما يكون أداءها أقل بسبب طبيعة تكوينها الجسمي و النفسي… و في النهاية تستلم هي وياه نفس الراتب! صراحة.. شي يرفع الضغط… طبعا في حالات إنه تكون الحرمة أكثر كفاءة من الرجل.. بس مو دايما.. و مع ذلك.. الرجال لازم يستلم راتب أكثر!!

    ابتهال الفجر…
    الحين كل هالحلاوة و الجمال تقارنينه بهالي اسمه ماجد..مال مجلة البزران!
    مع احترامي لج.. أنا أحلى منه بألف مرة!

    ما عليا.. حسابج بعدين..

    هالرواتب يستلمونها موظفات ممكن يكونن مجرد إداريات في أي دائرة محلية.. بس في إمارة أبوظبي..تخليلي إدارية تتساوى في الراتب مع مهندس و طبيب …
    و بعدين أغلب هذلا الموظفات مش متزوجات.. و إذا متزوجات فأزواجهم مرتاحين.. فنا يضطرون يقتسمون الحياة معاهم.. فو الحكمة الحين من المساواة؟
    أنا ألي أشوفه عندنا إنه هالفلوس تنصرف في كماليات و شغلات مالها داعي.. إلا من رحم..و تعالي شوفي المولات و الأسواق عندنا و بتعرفين عن شو أتكلم!

    صراحة ردودكم طويلة..و أنا تعبان أريد انام.. فبكمل معاكم بكرة إن شاء الله!..
    سلملم

  17. صباح الخير علالالالالاوي …
    اولاً : بما ان المرأة والرجل من نفس الفصيل ( بشر ) فأعتقد انه من الطبيعي انهم بيتشابهون في نقطة ان إلي يتعب ويدرس يحصد نتيجة تعبه ( راتب زين ) هذا طبيعي ومب منحق الرجل ان يطالب انه يساوى مع المرأة وهو بدون شهادة لمجرد انه رجل . (كلمة رجل ما عليها علاوة في الدوائر الحكومية ).
    ثانياً : ان في اغلب الاحوال في زمنا هذا المرأة تعمل علشان تعيل نفسها وتعاون زوجها على تحمل اعباء الحياة وخلنا نتخيل .. لو ان الدولة طلعت قرار ان المرأة الغير متزوجه يحقلها تعمل اما الي متزوجها تجلس في البيت علشان تربي عيالها لتحسين الانتاج ونطلع جيل من الرجل (الغير دلوعين) يتحملون المسئوليه نشيطين تكون الاسرة اول الاولويات .. على ان يتم زيادة راتب الزوج على الاقل خمسين بالمائة انا متأكده ان نص الحريم بييلسون في البيت.
    ثالثاُ : إذا كانت الموظفه تدفع نص راتبها علشان تساعد زوجها في تحمل اعباء الحياة وطبعاً هذا يعتبر كرم اخلاق منها مب واجب عليها فمنحقها انها ادلع نفسها شوية بالمعقول( طبعاً انا ما شجع الاسراف والفشرة ) … اعتذر على الإطاله وسامحونا

  18. اذا كان المال هو السبب وراء قبول المرأة بالزواج فأستطيع القول بأنها كانت مستعبدة

    أما التساوي في الرواتب — من وجهة نظري أن تحديد الراتب يجب أن لايخضع لجنس معين ، بل إلى نوع المسؤولية وحجمها ومستوى الإحترافية الذي يحتاجه العمل

    بالمناسبة … اذا بدأت تستلم ٣٠ هل حتبطل تدوين؟؟

  19. يا مرحبا الساع …

    أراميا>>>>>مب أول شي خلها تحصلها زوج قبل لا تفكر في إنه يتزوج عليها؟
    و مثل ما قلتي.. الحرمة مكانها بيتها أبرك لها.. شو تبا بالدزام و عوار الراس؟!

    عابرة >>>>شكلج عايشو في كوكب ثاني… و حلوة هاي سالفة أبوظبي حبت (تفشخر) موظفيتها.. بس يا ليت لو الفشخرة كانت بس على الرياييل كنا بخير..بس فشخروا الحريم.. و كبروا ريسانهم علينا.!

    ماأدري ليش تعتبرون الوظيفة تأمين للمستقبل و تفترضون إنه الرجل بيتزوج على حرمته مع إنه حالات التعدد هالأيان.. أقل من نادرة!!

    Melody>>>>شوي شوي على عمرج عن ما ينقع عرج و للا شي ههه
    أنا لا حاقد و لا شي.. بس ماأنكر إني مغتاظ من هالسالفة….
    الحرمة في نظري تبقى حرمة.. و الريال ريال…و كل واحد له طبيعة و تكوين مختلف بس للأسف الحريم إلا يبون يغيرون هالطبيعة..

    و مع احترامي لرايج.. الرجال أكثر جدية من النساء في العمل…و النساء قلة منهم الي ممكن يتساوين بالرجال.. على الأقل ما عندنا سوالف الحمل و الولادة و إجازة 6 شهور وضع.. و بطني تعورني اليوم و ما أقدر أداوم بسبة الدورة الشهرية.. سوري يعني.. بس هاي السوالف وايد و تستوي…فكيف الحرمة بالله عليج أكثر إنتاجية! خبريني!

  20. جولة أخرى مع الردود..

    نبدأ مع الأخت نادية>>>>> مع احترامي لرأيك و لكن المرأة غير ملزمة بالصرف على البيت فهذا هو واجب الرجل.. و المرأة مخيرة في هذا الموضوع و ليست مغصوبة….أعرف رجال مستحيل يمدون أيديهم على رواتب زوجاتهم حتى و هن موظفات و يتكفلون بمصروف البيت كامل..لا و يعطون مصروف لزوجاتهم مع إنهن موظفات..
    الي صاير إنه الحرمة صارت تشتغل هالأيام بس لمجرد الشغل و مش حاجة و للا رغبة في مشاركة الرجل مثل ما قلتي.. اللهم إنها عندها شهادة.. و (حرام) تيلس في البيت…. و النتيجة إنه الأولاد يتربون بين الخدم و السواقين..
    أما إنه الموظفة انتاجيتها أكثر من الموظف.. فاسمحي لي.. أنا صح ماأشتغل بس من خلال احتكاكي بالموظفات في الدواير و الحكومات.. أشوف العكس صراحة… نصهن مسغولات بالسوالف الفاضية مع ربيعاتهن.. و النص الثاني يا يعدل الشيلة و العباية يا يحط مكياج!

    عابر سبيل>>>> مب جنك شوية مضيع عن الموضوع؟ لول… عموما شكرا على السؤال!

    وتر>>>>> و يهنينا و نلاقي شغل!

    بدر الشايع>>>> ممكن التدريس له وشع مختل لأنه كلا الجنسين يقوم بنفس الواجبات و المسؤوليات.. لكن ف يالوظايف الثانية بصراحة حرام إنهم يتساوون…
    ياخي إنت يوم تتكلم عن بنات موظفات يصرفن على بيوت أهاليهم أو زوجات يشاركن أزواجهن في المصروف إنت تتكلم عن حالات محدودة.. لأنه الشايع و الأكثر انتشارا .. و أنا متأكد من هالكلام .. إنه الي يتوظفن هن غير المحتاجات للشغل من الأساس… و كله طبعا على حساب رجل في حاجة للوظيفة.. طبعا يستثنى من هالشي الوظايف إلي تحتاج إلى المرأة مثل التدريس و الطب.. إلخ..

    مبارك>>>>>>>>> و الله إنك جبتها من الآخر… بس هل يا ترى بيعجبهن هالكلام؟

    سنيورة>>>>>>>>ما حد اعترض على تعليم المرأة.. لكن الوظيفة.. برايي إذا في مكان زايد!

    سالم الإمارات>>>> الحرمة ما عمرها كنت مسؤولة عن مصاريف البيت.. و مثل ما قلت في رد سابق.. إنها ممكن تساهم عن طيب خاطر و بالتفاهم مع الزوج.. و لكن بدون إلزام…

    و الله مب قاهرني ف يالحريم إلا سلسلة الإجازات الي عندهم.. وضع و حمل.. و رضاعة ومدري شو.. تلاقي الوحدة منهن طول السنة إجازات و في النهاية راتب كامل.. لا و مساوي لهالريال المسكين إلي ما ياخذ إجازته السنوية إلا بطلعة الروح!

    حمد>>>>>>>> و أناأقول لي كل يوم يفتحون مول يديد.. عارفين زباينهم!

    بوسعيد العامري>>>>الريال مسكين.. لازم يدوخ السبع دوخات علشان يلاقي وظيفة.. .. و الحرمة تلاقيها باردة مبردة… أقول.. شفت حلقة طاش ما طاش يوم السدحان و القصبي ثلوا إنهم أزواج مغضوبين عليهم.. إذا ما شفتها شوفها علشان تعرف الإجابة على أسئلتك…

    نجمة>>>>>>>> بسألج سؤال.. الأسد و اللبوة هل هم متشابهين؟.. أكيد بتقولين هي.. بس هل عليهم نفس المسؤوليات في الغابة؟ هي الحرمة و الريال من نفس الفصيل .. بس مب نفس المسؤوليات…. و قيام الحرمة بنفس الوظيفة مب معناها إنه عليها نفس المسؤوليات الحياتية..
    وبعدين أنا أتكلم عن الرجل و الحرمة أصحاب نفس المؤهل…أول كانوا يخصمون علاوة السكن عن الموظفة المتزوجة لأنها ساكنة مع زوجها.. بس الحين صار سيم سيم.. بس على أي أساس ما أدري صراحة!

    ياسر>>>>>>>>أنا إذا استلمت 10 آلاف ببطل من بكرة.. بس خلني ألاقي شغل أول شي.. الحريم خلولنا شي؟!

    العرفان>>>>> يا فرحة كل القطاعات أولهن صالونات التجميل!

    تحياتي للجميع.. ماشاء الله أثريتوا الموضوع بردودكم الحامية.. و سامحونا على طولة اللسان!

  21. اخوي علاوي …. مهما قلت ومهما سويت … ولو طلعت ونزلت وكمان نطيت

    بتكون النتيجة

    صفر ,,, ولا شي

    تعرف ليش ؟؟؟؟؟؟؟؟

    لان الدنيا ماشية بالمقلوب …. مثل ما قلت زي طاش ما طاش

    بس من رايي ان العتب كله في الاول والاخير من الرياييل

    الي قلت فيهم الغيرة والنخوة ,, وصار همهم الفلوس وتجاهلوا واجبهم الاهم الي بيسالهم عليه رب العباد , فالرجل راع ومسؤل عن رعيته , والمراة راعية ومسؤلة عن رعيتها الي هم عياله وتربيتهم وراحة زوجها مب الشغل والسيارة والماركات ( عافانا الله )

    طبعا الكلام اعلاه مستثى منه النساء المحتاجات للعمل كالمطلفة والارملة والي زوجها مسجون و ما شابه ,, وكذلك المدرسات والطبيبات الاتي اكن لهن كل احترام

    تحياتي لك ولموضوعك الجريء

  22. أذكر أن الوزيرة مريم الرومي قالت مرة في لقاء مع طلبة متميزين من المرحلة الثانوية ومرحلة الجامعة قالت : الآن نحن نتحدث عن تمكين المرأة وحقوق المرأة ، وأنا أظن بعد خمسة سنين بنتكلم عن حقوق الرجل وتمكين الرجل …

    أما تعليقي : فليس ضروري انتظار خمسة سنين فهذا هو المشاهد الآن .

  23. السلام عليكم

    مب مهم رجل ام امراة .. المهم بعد التعود على نمط الحياة المترفة دون الوعي للغلاء المتزايد من حولنا مع بقاء فئة كبيرة من الموظفين الغير تابعين للهيئات المحلية يصارعون للصراع للبقاء لاخر الشهر بكرامة.. و السبب تضاعف الرواتب من حولهم و هم بلا حول و لاقوة غير الدعاء و انتظار مكرمة شيوخنا الكرام..لماذا الجشع المتزايد من قبل الافراد و التجار؟؟!! انا مع بعض الاخوة في رفع راتب الرجال اكثر من النساء بدرجة معقولة لكونهم العائل الاكبر في الاسرة لكن ماذا ان كان راتب المراة في يد الرجل دون وجه حق ؟؟!! ما المشكلة ستكون عند الرجل عن تقارب الرواتب؟؟!! ان دولتنا الحبيبة تعيش طفرة كبيرة في كافة الاوجه و منها تغير مفهوم ان الرجل هو المعيل الوحيد للاسرة بالعكس ان المراة الاماراتية تقف يدا بيد مع الرجل لتحقيق الافضل لاسرتهم..و وطنهم

    اختكم..مؤسسة اتحادية

  24. الطبيعي ان المرأه والرجل لو بيادوا نفس الوظيفه ليهم الحق ف نفس الاجر ومش هتكون واحده مش شايفه شغلها كويس ومش بتعمل اللى مطلوب منها كما ينبغي وتاخد مرتب زي الراجل لو دا حصل اساسا مش هتاخد مرتب لانها هتتفصل من شغلها

    وانت قلت ان ربنا قال للذكر مثل حظ الانثيين ف دا ف الميراث مش اكتر

  25. لا مش طبيعي يختي.. لأنه المسؤوليات الي على الراجل غير الي على الست!
    و الموضوع ما ينطبقشي بس على الميراث! مين آل ؟

    لازم يكون فيه شيوة تفاضل ما بين الاتنين! ميصحج الست تاخذ زي الراجل… دي مهزلة بكل المآييس!

  26. عفوا، أخ علاوي
    لقد قرأت جميع ردودك على المشاركين بالموضوع
    أرى بأن مبدأك في الرد هو فقط التعصب لما قمت بطرحه، ولا تقبل برأي الآخر إن خالفك فيه

    أسلوب غير حضاري بالنقاش، أرجو أن تناقشنا بالحقائق وألا تعمم على الجميع بناءً على فئة معيّنة

    ناقش بالحقائق وليس فقط عنادا وتعصّبا من أجل العناد، فليس هكذا يكون النقاش

    ودمتم

  27. أي حقائق و أي أدلة.. و ين نحن؟ .. في مركز شرطة و للا في نياية.. خخخخخ

    أنا طرحت رايي في هالموضوع بصراحة .. و الي الظاهر ما عجب الكثيرين.. و أعتقد إني منهم.. و
    هالشي متوقع من البداية…لأنه للأسف كلام الحق ما يتقبلونه الناس..

    و خليج يا أخت نادية طبيعية.. يعني تيكيت إيزي..السالفة مجرد طرح وجهة نظر.. لا أكثر ولا أقل

  28. أخويه عللاوي ..
    ترا كلامك مو غلط
    فيه آية ..الله سبحانه يقول فيها: ” الرجال قوامون على النساء بما فضل الله بعضهم على بعض و بما أنفقوا من أموالهم”
    و فيه آية ثانية ذكرت فيها : ” و لهن مثل الذي عليهن بالمعروف و للرجال عليهن درجة والله عزيز حكيم”
    يعني سبحان الله ..الله فضل الرجال في هذه المواضع و الله أدرى بحاجة كل من الرجل و المرأة ..
    و بس ..هذه الإضافة اللي حبيت أضيفها
    و الله يعطيك العافية ..

  29. الحين إنته مناشب بنات بلادك على الراتب اللي يستلمنه
    !!!

    بغض النظر البنت وين تصرف راتبها

    لا تنس إنه الأرزاق بيد رب العالمين وهو اللي مقسم الرزق على عباده
    والبنت مهما كانت شهادتها و وظيفتها فهي كانت تستلم راتب ضعيف وما تذمرت وربك كتب لها انه الحكومة تزيد لها راتبها ليش تعترض على اللي كاتبه ربك لهاي البنت

    بتحسدون بنات بلادكم !!!!!

    ليش عيل ما تكلمت وقلت الأجانب في الشهر يستلمون فوق 70 ألف .. ويوم صارت الزيادة صكت رواتبهم المية وفوق

    حاسبت بنت بلادك وما حاسبت هالأجنبي ؟؟؟؟؟

    وهالأجنبي سيارته من الحكومة بيته من الحكومة تذكرة سفره على الحكومة

    معاشه هذا اللي 100 فوق وين بيوديه ؟؟

    مناشبين المواطنات على رواتبهن .. ترى الأرزاق موزعة جذيه ليش تعترض على قدر ربك

    يوم هالأجنبي يقبض هالمعاش ما قلنا شي لانه الكل يعرف انه هاي ارزاق

    ولو تركض ركض الوحوش غير رزق ما تحوش

  30. أراميا>>>>>>و الله إنتي الي فيهم يا أراميا.. هذا الكلام المنطقي و للا بلاش!
    الله يعطيهم شوي من عقلج.. قولي آمين….!!

    على شو إن شاء الله بناشبج يا المواطنة؟….أنا أتكلم عن حقوقنا معشر الرجال الذي ضاع هالزمان مع دعايات الماساواة و حقوق المرأة.. حتى صرنا في النهاية سيم سيم.. و مع إنه مسؤلياتنا و التزاماتنا مافي سيم سيم!

    و الأجانب امبونهم من أول مسترزقين في بلادنا.. شو دخل موضوع الأجانب الحين في رواتب الموظفات!

    الأرزاق نعم موزعة.. بس الواحد بعد ياخذ بالأسباب.. و بالمنطق!

    و هدي أعصابج.. ترى في النهاية تستتلمون انتوا نفس الرواتب!

    يعني كلامي لا بيجدم شي.. و لا بيأخر!

  31. بصراحة … اسمحلي اقول … الله يخلي ولاد هالبلاد … ياللي البلاد ما مقصرة فيهم … و اتحاول قدر الإمكان اتوفرللهم الأفضل و هم ما مقدرين … أخوي ….. خلاني أعطيك صورة من اللي أشوفه في واقعنا مثل ما انت وصفت الواقع اللي اتشوفه

    عندك أب و أم … ربوا ولدهم و تعبوا عليه …. دخلوه المدرسة … صرفوا عليه … حطوا له مدرسين خصوصيين … و هو كل يوم و الثاني راسب في مادة … وصل الثانوية … ما صدق يتخرج من الثانوية إلا وراح الجيش …. فروه في دورة الأغرار كم شهر … و بعدين اشتغل جنيدي … نفس الحالة إذا كان الولد يريد يروح الشرطة.

    شو رايك بهالصورة … هاي الصورة اتمثل أكثر من 10 بالمية من أبناء بلدنا الغالي … خلني أعطيك حقيقة ثانية و اللي هي … نسبة عدد الطلاب الجامعيين لنسبة الطالبات الجامعيات … أنا ما أذكر الإحصائية بالضبط … لكن خلني أعطيك تقريب لها … عندنا في الإمارات نسبة هي 1 : 5 طالبات … بالذمة ألحين المؤسسات الحكومية بغت اتوظف جامعيين … من وين بتلقى إن كانت نسبة الجامعيين بالنسبة حق الجامعيات جدا ضئيل … اللي خلى عدد النساء العاملات هو علمهن و مؤهلاتهن لا أكثر.

    و الله البلاد ما اتقصر … خصه بالنسبة للرجل … وفرة له أكثر من المطلوب … بس هو اللي مش هامنه … و مش حاس بالنعمة … أكثر المنح للسفر للخارج موفرة للرجل أكثر من المرأة … أكثر الترقيات موفرة للرجل أكثر من المرأة … الدوائر صايرة تركض ادور رجل واحد عشان اتشغله … يعني السالفة كلها ما يحتاي لها إلا مجرد اشوية ركيض ما بين الدوائر الحكومية و بتلقى وظيفة … و اسعى يا عبد و أنا أسعى وراك … أنا ما أنكر سالفة إنه البطالة بدت اتزيد … لكن هذا ما سببها إلا الواسطات و ما شاء الله دنو المستوى العلمي و قلة المؤهلات لدى معظم العاطلين.

    خلني أبين وجهة نظر ثانية … الأسرة مثل ما قلت مهمه جدااااااااااااااااااااااااااا … و أشدد على كلمة جدا و بالنسبة لي بالذات الأبناء شي مقدس في الحياة … وهبهم الله سبحانه و تعالى لنا عشان انربيهم و انقوم برعايتهم و تربيتهم .. مش عشان اتربيهم الخدامة … لكن إن كانت المرأة مضطرة انها تشتغل عشان اتغطي مصاريفهم و اتساعد زوجها ليش لا … و حتى لو بغت عشان نفسها ليش لا … بس المهم هالشي ما يطغى على دورها كأم في البيت … شو بتكون فرحتي لو مثلا كانت أمي دكتورة أو مدرسة أو مديرة في مؤسسة حكومية كانت أو خاصة… بتكون مثل أعلى لي.

    و بالنسبة حق الراتب … أنا أشوف المفروض إنه يعتمد على رتبة الموظف و الموظفة أما العلاوات … فهاي من حقك اتقول إنه لازم اتكون في زيادة للرجل بحكم إنه رب أسرة و اساسها … لكن غير جي لا … مش لأنه رجل رجل و المرأة مرأة لازم يتفرق بينهم. و بعدين الحديث اللي ذكرته هب في مكانه … لأنه الورث غير عن الراتب … لأنه الراتب هو نتيجة عمل … أما الورث هو نتيجة وفاة أحد الأقارب … يعني انت ما تعبت فيها خير شر.

    بدل ما اتفر حرتك على البنات بشكل عام …. فكر بحل لمشكلة البطالة عندك … و ترا مش لازم تتوظف عشان اتعيش … عندك مخ تقدر اتشغله و تبدالك بمشروع صغير…بدل ما اتذل عمرك حق الدوائر و تيلس و انت حاط ايدك على خدك تتريا وظايفهم … ياما ناس قامت تبدا بمشاريعها عشان بس اتودر وظايفها.

    (وبعدين أنا أشوف إنه إنجاز إنه الولد يتفوق و يجيب علامات عالية و هو جامع بين الاثنين.. الصياعة خارج البيت و الدراسة في نفس الوقت… هذا معناه إنه الأولاد عباقرة!)

    حزة في نفسي هالجملة … يعني تبغي اتكون فيه مساواه بين صايع و موظفة تشتغل من خاطرها… يوم هذا كلامك يالمواطن … يالرجل … ياللي مستقبل البلاد بين يديك … عيل منو بيشلها البلاد و بيقوم بها ؟؟؟

  32. تعديل على مشاركتي :

    بصراحة … اسمحلي اقول … الله يخلي ولاد هالبلاد … ياللي البلاد ما مقصرة فيهم … و اتحاول قدر الإمكان اتوفرللهم الأفضل و هم ما مقدرين.

    أخوي ….. خلاني أعطيك صورة من اللي أشوفه في واقعنا مثل ما انت وصفت الواقع اللي اتشوفه
    عندك أب و أم … ربوا ولدهم و تعبوا عليه …. دخلوه المدرسة … صرفوا عليه … حطوا له مدرسين خصوصيين … و هو كل يوم و الثاني راسب في مادة … وصل الثانوية … ما صدق يتخرج من الثانوية إلا وراح الجيش …. فروه في دورة الأغرار كم شهر … و بعدين اشتغل جنيدي … نفس الحالة إذا كان الولد يريد يروح الشرطة.

    شو رايك بهالصورة … هاي الصورة اتمثل أكثر من 10 بالمية من أبناء بلدنا الغالي … خلني أعطيك حقيقة ثانية و اللي هي … نسبة عدد الطلاب الجامعيين لنسبة الطالبات الجامعيات … أنا ما أذكر الإحصائية بالضبط … لكن خلني أعطيك تقريب لها … عندنا في الإمارات نسبة هي 1 : 5 طالبات … بالذمة ألحين المؤسسات الحكومية بغت اتوظف جامعيين … من وين بتلقى إن كانت نسبة الجامعيين بالنسبة حق الجامعيات جدا ضئيل … اللي خلى عدد النساء العاملات يزيد هو علمهن و مؤهلاتهن لا أكثر.

    و الله البلاد ما اتقصر … خصه بالنسبة للرجل … وفرة له أكثر من المطلوب … بس هو اللي مش هامنه … و مش حاس بالنعمة … أكثر المنح للسفر للخارج موفرة للرجل … أكثر الترقيات موفرة للرجل … الدوائر صايرة تركض ادور ريال واحد عشان اتشغله … يعني السالفة كلها ما يحتاي لها إلا مجرد اشوية ركيض ما بين الدوائر الحكومية و بتلقى وظيفة … و اسعى يا عبد و أنا أسعى وراك … أنا ما أنكر سالفة إنه البطالة بدت اتزيد … لكن هذا ما سببها إلا الواسطات …. و ما شاء الله دنو المستوى العلمي و قلة المؤهلات لدى معظم العاطلين.

    خلني أبين وجهة نظر ثانية … الأسرة مثل ما قلت مهمه جدااااااااااااااااااااااااااا … و أشدد على كلمة جدا … و بالنسبة لي بالذات الأبناء شي مقدس في الحياة … وهبهم الله سبحانه و تعالى لنا عشان انربيهم و انقوم برعايتهم و تربيتهم .. مش عشان اتربيهم الخدامة … لكن إن كانت المرأة مضطرة انها تشتغل عشان اتغطي مصاريفهم و اتساعد زوجها ليش لا … و حتى لو بغت عشان نفسها ليش لا … بس المهم هالشي ما يطغى على دورها كأم في البيت … شو بتكون فرحتي لو مثلا كانت أمي دكتورة أو مدرسة أو مديرة في مؤسسة….. حكومية كانت أو خاصة… بتكون مثل أعلى لي.

    و بالنسبة حق الراتب … أنا أشوف المفروض إنه يعتمد على رتبة الموظف و الموظفة أما العلاوات … فهاي من حقك اتقول إنه لازم اتكون في زيادة للرجل بحكم إنه رب أسرة و اساسها … لكن غير جي لا … مش لأنه الرجل رجل و المرأة مرأة لازم يتفرق بينهم. و بعدين الآية اللي ذكرتها (للذكر مثل حظ الأنثيين) هب في مكانه … لأنه الورث غير عن الراتب … لأنه الراتب هو نتيجة عمل … أما الورث هو نتيجة وفاة أحد الأقارب … يعني انت ما تعبت فيها خير شر.

    بدل ما اتفر حرتك على البنات بشكل عام …. فكر بحل لمشكلة البطالة عندك … و ترا مش لازم تتوظف عشان اتعيش … عندك مخ تقدر اتشغله و تبدالك بمشروع صغير…بدل ما اتذل عمرك حق الدوائر و تيلس و انت حاط ايدك على خدك تتريا وظايفهم … ياما ناس قامت تبدا بمشاريعها عشان بس اتودر وظايفها.

    (وبعدين أنا أشوف إنه إنجاز إنه الولد يتفوق و يجيب علامات عالية و هو جامع بين الاثنين.. الصياعة خارج البيت و الدراسة في نفس الوقت… هذا معناه إنه الأولاد عباقرة!)

    حزة في نفسي هالجملة … يعني تبغي اتكون فيه مساواه بين صايع و موظفة تشتغل من خاطرها… يوم هذا كلامك يالمواطن … يالرجل … ياللي مستقبل البلاد بين يديك … عيل منو بيشلها البلاد و بيقوم بها ؟؟؟

  33. الظاهر مافي فايدة من النقاش في هذا الموضوع.. و ما أظني بنوصل إلى حل وسط أبدا في ظل التعصب النسائي لنقطة المساواة ..

    تحجج أنتي و غيرج اختي بنقطة تفوق عدد النساء على الرجال مب عذر علشان تفضل على الرجل و تقدم عليه.. فحتى لو صار عدد الحريم 10:1 مازال الرجل هو المسؤول و هو الملزم بتاسيس بيت وتوفير مصاريف الزواج و الإنفاق على الأبناء…و الحرمة ما عمرها كانت ملزمة و إنفاقها مجرد مشاركة من عندها..

    وخليني أسألج .. و ياليت إنتي و غيرج من المتعصبين تجاوبون بصراحة.. كم نسبة الموظفات الي حاليا يشتغلن في الدوائر الحكومية في حاجة ماسة للشغل؟
    لو سوينا إحصائية سريعة بنلاقي نسبة الي فيحاجة لا تذكر..يعني أغلبهن عازبات ..توهن متخرجات..أو عازبات عانسات من عائلات ميسورة و عندهن شهادات و ما يبون يقعدن في البيت.

    نعم إذا كانت الموظفة مطلقة.. أو أرملة.. أو تعول أسرة…فما عندي أي مشكلة و ما أظني حد عنده مشكلة إذا اشتغلت.. بل بالعكس مثل هذي الحالات لازم تقدم للحصول على الوظيفة في حال استيفائها على جميع الشروط والمؤهلات..

    أما إني أوظف هذيلا قوم بو قذلة.. و ميكاج.. و عبايات مخصرة…لا.. و بعد أعطيهن نفس راتب الموظف المسكين الي يكرف و يتعب علشان يصرف على عياله..و يربيهم أحسن تربية…فبقولج اسمحي لي!

    أنا في هالمقال ما حكمت الشرع و لا الدين علشان ما يقول حد إني أصولي و إرهابي مع إنه المفروض أي شي في حياتنا نوزنه بميزان الشرع؟؟؟..أنا يالس أوازن بالمنطق والعقل

    واحد عليه مصاريف ومسؤليات.. مقابل وحدة ما عليها أي مسؤوليات أو إلتزامات (إلا في حالت خاصة علشان ما تزعلين إنتي و غيرج)… هل يستوون يا ناس؟

    عموما شكرا على مشاركتج…مع اني أختلف معاها,,,

    و سلمتم.!!.

  34. الراتب المبالغ فيه يسبب العنوسه خخخ

    نطالب بعدم المساواة في رواتب الموظفين والموظفات ولا نطالب ( بتقليل ) رواتب الموظفات

  35. مدري وين اكون وياك ولا ضدك بما اني بنيه

    لكن انا انا معاك بالتاكيد هو انه ما يصير نساوي الريال بالحرمه

    .
    .

    وشيــ ثاني أنا اختي تشتغل في البلديه

    وراتبها كان 13 تقريبا مدري بعد الزيادات كم صار

    لكن على شغلها تستاهل والله

    وانا متاكده انه الحريم يكرفون مثل ما الرياييل يكرفون باشغالهم

    والزيادات بت على الكل

    بس الفرق هو الشهاده

    والشهاده ايضا الكل تعب عليها وكد

    وفي النهايه حصل مراده والمعشيه الطيبه

  36. الظاهر الأخ ايلي كتب عن زيادة الرواتب ماطالع غير الدائرة ايلي يشتغل فيها وكتب عنها … فأقول له رح شف المعلمة والمعلم شو يصير فيهم وأخرتها ملاليم لاتغني ولاتسمن من جوع وسط هالغلاء !!! سهر وتعب وتحضير وتصحيح وأنشطة ودرجات وتدريس برع وداخل البيت وجلسه للعصر أو المغرب وقت الامتحانات في تصحيح الأوراق بدون مقابل هذا كله مب محسوب ؟ وياليت حد يحس بهالأوادم كأنهم مكاين ماتخترب ..والمعلمة جهدها أضعاف جهد المعلم لأنها أم وربة بيت يعني وراها شغل ثاني لما ترجع البيت .. ومن قال إن مصروف البيت على الرجل فقط هذا الكلام زمان أما الأن فالمرأة عندما خرجت للعمل أصبح دورها مضاعف وتصرف على أولادها وعلى البيت والخادمة والمدرسة والسيارة إذا كانت تسوق .. وأنت تتكلم عن الفتيات الغير متزوجات وليس المرأة المتزوجة التي تحتاج للعمل حتى تساعد زوجها.. فليس الهدف من العمل تغيير اللوك أو العباية أو السيارة .. فهناك الأهم قبل هذه التفاهات الزائلة .. ودمتم سالمين

  37. لا حول و لا قوة الا بالله
    ليش هالحسد؟؟؟؟؟

    رجاء لا تتطرق للآيات القرآنية بصورة غير دقيقة..لان الآية اللي ذكرتها خاصة بنصيب المرأة من الميراث في الوصية..
    و
    المرة مثل الريال في العمل و تقبض اللي يقبضه و الدنيا ارزاق؟؟

  38. الله يعافيك على ما كتبت شي طيب
    انط توضح لنا امور نحب راي الاخرين يكون مسموع فيها.
    انا اشوف ان مساواءه الراتب بين الجنسين ما فيها شي
    اصلن الرتب كان زايد او ناقص عزباء او متزوجه فهو لها
    ولبيتها ولاسرتها الصغيرة, ليش نحسد البنات ونقول قللوا
    من رواتبهم ,الدوله تعطي رب العمل يعطي لامانع من ان ناخذ
    بالتساوي.

    dreem624@hotmail.com

  39. السموحة منك شيخي كانك تعتقد أن كل الموظفات مايستاهلون ان يستلمون هذا الراتب فبغض النظر عن ان النسبة الغالبة في هالوقت ان البنات يكونون مستهترين من ناحية الكماليات والصرف في الأمور الثانوية في بعد فئة ماتقدر انها تعيش بهالراتب من كثرة المسؤوليات الأسرية كونها متحملة عائلتها وهي مب متزوجة تراها أصابعك مب كلها سوا ياخوي وجزاك الله ألف خير

  40. مرحبا بكل الاراء
    الكل يستاهل الزيادة لكن لو كانت الرواتب مثل ما هي وجت الزيادة في علاوات مهمة مثل العلاوة الزوجية وعلاوة الابناء بحث تكون علاوة الطفل 2000 بدل 600 كان افضل بكثير وكان بيشجع المواطنين على زيادة الانجاب ويزيد الراتب كل ما زادو العيال لان مش ممكن يكون الفرق بين العزوبي او البنت مع شخص عنده عشر اولاد 6000 بس ولا تنسون اننا ما نزيد عن 20% في احسن الاحوال ويكون الراتب في هالحاة متناسب مع عدد افراد الاسرة وموضوع العلاوة الزوجية مهم جدا لان هناك بعض من النساء يبون يتفرغون في البيوت لتربية عيالهم خاصة ان زمننا هذا يتتطلب وجود اولياء الامور معاهم كي لا ينحرفو في اخلاقهم

  41. عندنا مشكلة كبيرة في الدولة هي ان اغلب المسؤولين في الدوائر يوظفون البنات اللي من اسر مرموقة وغنية اما بنات الفقر اللي هم فعلا في حاجة ماسة للوظيفة لظروف عائلتها الصعبة يسوولها طاف الا اذا كانت من النوع اللي يرضي اهوائهم

  42. I think you are very illiterate person. If you envy women for their salaries, which actually they earned it by their own effort and they really deserve it; you should, instead of being such a “Baleful”, be a real man and complete your higher education[if you originally have a degree in first place].

  43. ما اشوفك عقبت ع كلامي اخ علاوي لا انت ولا غيرك
    والا الصراحة ما تعجب حد

Comments are closed.